Փաստերի ստուգում

Այսօր՝ տեղեկությունների շրջանառման ամենաթեժ շրջանում, ճշգրիտ և ստուգված ինֆորմացիա ստանալը գրեթե անհնար է: Կեղծ և չճշտված ինֆորմացիան որսալու համար անհրաժեշտ է յուրաքանչյուր լուր վերլուծել, գտնել տեղեկատվության իրական աղբյուրներն ու ստուգել դրանց ճշմարտացիությունը:
Արարատ Ինֆոտան թիմն այդ նպատակով ուսումնասիրեց <<Իրավունք թերթում>> հուլիսի 23-ին հրապարակված <<Արարատի մարզում սկսվել է թռչնաժանտախտի համաճարակ. գյուղնախը հավի ականջում քնած է>> հոդվածը ( https://www.iravunk.com/news/62947 ): Նյութում օգտագործված ոչ գրագետ և ժարգոնային արտահայտությունները կարելի է նկատել առաջին իսկ հայացքից, որն արդեն իսկ ցույց է տալիս լրագրողի ոչ մասնագիտական մոտեցումը հոդվածին: Հոդվածն ավարտվում է վերը նշված պնդումները հաստատող արտահայտությամբ՝ ՙՙ ...եւ գյուղացիները ինչպես կարողանում են, այդպես էլ իրենց գլխի ճարը տեսնում են: ՚՚ Նման ձևակերպումները փաստում են ոչ պրոֆեսիոնալ լրագրողական աշխատանքի մասին:
Մեկ ուրիշ կարևոր խնդիր է ներկայացված բոլոր պնդումների աղբյուրների բացակայությունը: Հոդվածը սկսվում է ՙՙԱրարատի մարզի տարբեր գյուղերից ստանում են ահազանգեր...՚՚  նախադասությամբ, սակայն նյութում ոչ մի տեղ չի նշվում, թե ովքեր են ստանում այդ ահազանգերը, և որտեղից է հեղինակն իմացել այդ ահազանգերի մասին: Հոդվածում նշվում է նաև, որ գյուղացիները շտապ պատվաստումներ են անում, սակայն շիճուկը չի բավականացնում և ստիպված թռչունների սպանդ են իրականացնում: Հղում չի կատարվում որևէ աղբյուրի կամ գյուղացու, որտեղ հաստատվում է այսպիսի դեպքերի իսկությունը:
Հոդվածում տեղադրված լուսանկարի Google որոնման արդյունքները առավել քան հետաքրքիր էին. նկարն օգտագործվել է տարբեր լեզուներով օտարերկրյա լրատվամիջոցների կողմից, որոնց մեջ գերակշռում է ադրբեջանական հոդվածները 2017 թվականի թռչնագրիպի մասին ներկայացնող հոդվածներում, իսկ 2016-ին նկարն օգտագործվել է 2016-ին Ուկրաինային հավեր ներմուծելու մասին մեկ ուրիշ հոդվածում: Օգտագործելով TinEye նկարների որոնման գործիքը, կարողացանք ճշտել, որ լուսանկարն առաջին անգամ օգտագործվել է 2015-ին pinme.ru կայքում: