Երիտասարդների խնդիրները համայնքում

Երիտասարդները համայնքի շարժիչ ուժն են։ Սրա մասին շատ ենք լսում, սակայն ոչ միշտ է, որ այն համապատասխանում է իրականությանը։ Չնայած այն փաստին, որ մեր համայնքի երիտասարդները ունեն այդ շարժիչը դառնալու ահռելի ներուժ, մեզնից շատերը նախընտրում են իրենց ներդրումն ունենալ Երևանում։ Գլխավոր պատճառը մեկն է՝ Երևանում հնարավորությունները շատ են։

Երիտասարդների գլխավոր խնդիրներից մեկը Արարատի քաղաքային համայնքում աշխատատեղերի պակասն է։ Խնդիրն արդիական է ամբողջ Հայաստանում, սակայն Երևանում աշխատանք գտնելու հավանականությունը շատ ավելի բարձր է քան մարզային համայնքներում։

Մեկ ուրիշ խնդիր է համայնքում ժամանցային վայրերի պակասը։ Ազատ ժամանակն ընկերների հետ հետաքրքիր և արդյունավետ անցկացնելու համար նախատեսված ոչ մի վայր չկա, հենց այս պատճառով էլ երիտասարդները նախընտրում են իրենց ժամանցը կազմակերպել Երևանում։

Իհարկե երիտասարդներին մարզային համայնքներից հեռացնող պատճառները կարող են լինել ավելի մեծ, օրինակ բարձրագույն ուսումնական հաստատությունների մայրաքաղաքում կետրոնացված լինելը կամ ենթակառուցվածնքերի շատ ավելի բարձր զարգացվածությունը, սակայն այս խնդիրների շղթան լուծելու համար կարող ենք սկսել ամենափոքր տարրից, օրինակ՝ համայնքում հետաքրքիր մշակութային միջոցառումների կազմակերպումից։